Kundërsulm nga Irani: Po goditen bazat ushtarake amerikane në 6 vende

Pas sulmeve të gjera të SHBA-së dhe Izraelit ndaj Iranit, vala e kundërpërgjigjes së nisur nga Teherani u përhap në Gjirin Persik. Raketa iraniane shënjestruan bazat ushtarake amerikane në gjashtë vende. Në të gjithë rajonin, alarmi i sigurisë u ngrit në nivelin më të lartë.
Pas sulmeve të gjera ndaj Iranit, autoritetet në Teheran nisën kundërsulmin.

Trupat e Gardës Revolucionare Islamike njoftuan se kanë goditur Izraelin dhe bazat amerikane në Lindjen e Mesme me raketa dhe mjete ajrore pa pilot. Në vendet e Gjirit u dëgjuan shpërthime, ndërsa disa shtete mbyllën përkohësisht hapësirat ajrore.

Sipas agjencisë zyrtare iraniane IRNA, sulmet u cilësuan si “përgjigje ndaj agresionit armik”. Ushtria izraelite konfirmoi se nga Irani janë lëshuar raketa drejt territorit të saj.

Sipas raportimeve, Irani ka shënjestruar bazat amerikane në gjashtë vende.

Bahreini
Autoritetet në Bahrein njoftuan se raketat iraniane kanë shënjestruar selinë e Flotës së 5-të të Marinës Amerikane. U raportuan sirena alarmi dhe panik në mesin e popullsisë.

Në zona si Juffair, Amwaj dhe Muharraq u dëgjuan shpërthime të fuqishme dhe u panë re tymi. Bahreini është një nga qendrat kryesore të pranisë detare amerikane në rajon.

Katari
Në Doha u raportuan shpërthime të shumta. Ministria e Mbrojtjes e Katarit njoftoi se një seri raketash u interceptuan nga sistemet e mbrojtjes ajrore. U raportua se shpërthime u dëgjuan edhe pranë bazës ajrore Al Udeid, baza më e madhe amerikane në rajon.

Baza Al Udeid, e themeluar në vitin 1996, shtrihet në një sipërfaqe prej 240 mijë metrash katrorë dhe strehon rreth 100 avionë, dronë dhe rreth 10 mijë ushtarë.

Kuvajti
Vala e kundërsulmit arriti edhe në Kuvajt, një qendër kyçe logjistike për ushtrinë amerikane.

Dëshmitarët raportuan shpërthime dhe sirena paralajmëruese pas hyrjes së raketave iraniane në hapësirën ajrore. Autoritetet e aviacionit pezulluan të gjitha fluturimet komerciale drejt dhe nga Irani deri në një njoftim të dytë.

Arabia Saudite
Në Riad u raportuan shpërthime të fuqishme, sipas burimeve lokale.

Emiratet e Bashkuara Arabe
Agjencia shtetërore e Emirateve njoftoi se raketat iraniane u interceptuan nga sistemet e mbrojtjes ajrore. U raportua për një viktimë në Abu Dabi.

Shpërthime të shumta ndodhën pranë bazës ajrore Al Dhafra, një objekt ushtarak i përdorur bashkërisht nga Forcat Ajrore të Emirateve dhe ato amerikane. Emiratet deklaruan se sulmi përbën shkelje të sovranitetit dhe të së drejtës ndërkombëtare.

Jordania
Ushtria jordaneze njoftoi se ka rrëzuar dy raketa balistike që synonin territorin e saj.

Ambasada e SHBA-së në Jordani aktivizoi masën “qëndroni në vend” për personelin e saj dhe u rekomandoi qytetarëve amerikanë në vend të veprojnë njësoj deri në një njoftim të ri.